تأملات حياتيه فى وقائع مصرية

3- المشهد الثالث


وبيقولك هابى فالانتاين



خير اللهم اجعله خير فتحت عينى وجهزت زى كل يوم وخرجت من بيتنا

بصيت حواليا لقيت الدنيا كلها حموا

الراجل اللى ماشى هناك ده لابس احمر ، والست اللى جنبه هى كمان لابسه احمر

والبنت اللى واقفه شايله كتبها مشتنيه الاتوبيس بردو لابسه احمر

والولد اللى واقف هناك ده وشعره مغرقه جل وموقفه لفوق كده زى ما يكون لسه طالع من كشك الكهربا اللى جنب بيتهم بردو لابس احمر

وتوسعت فى نظرتى اذا بيا الاقى الشارع مليان ناس شايله هدايا وطبعا انا عاملة زى جيرى فى افلام الكارتون عينيا رايحة جايه ورا الهدايا بتفرج ولا كانها بالنسبة لجيرى حتة جبنه رومى رايح جاى معاها

وركبت الاتوبيس لقيت السواق لابس كوفيه حمرا هو كمان

وطبعاً انا ولا فاهمة أى حاجة !!!!

كل اللى جه فى تفكيرى المحدود لحظتها ان يمكن كان فى ماتش للاهلى امبارح وكسب فيه .. ولا تكونش مصر كسبت كاس العالم وانا معرفش؟؟؟؟ يمكن !!

او يمكن النهارده اليوم العالمى لتدعيم ومسانده مرضى الحصبة فى العالم

وبعدين قلت هو انا هفضل كده كتير ما اسال اى حد وخلاص


سألت البنت اللى جنبى " كانت لابسه احمر بردو" : احم .. هو النهارده فى ايه اصل كل الناس لابسه احمر؟

بصتلى بصه كلها استغراب تحس كده انه ممزوج بأرف : النهارده الفالانتاين انتى ايه مش عايشة فى الدنيا


حسستنى انى مبفهمش فى حاجة قلت لأ لازم استرد كرامتى وادارى الموقف باى حاجة :

قلتلها اه صحيح تصدقى نسيت

وبصيت لقيتها ماسكة شنطة هدايا ضربت عينى فيها لقيت فيها حاجة كده تقريبا ساعه رجالى فكملت بقى استهبال وقلتلها : اوووووووه دلوقتى ميزو هيزعل انى مش كلمته ومش جبتله هديه ...يارب بقى مش يزعل


المهم : نزلت من الاتوبيس ودخلت الكلية وكانت المفاجأة : ايه ده عيد الربيع ياخواتى الكلية كلها قلبت احمر ولا اجدعها فيلم مصاصين دماء "Vampires يعنى " وكله بقى لابس اللون ده اللى لايق عليه واللى مش لايق واهو اى احمر والسلام

والورد مالى الدنيا : ياعينى على البساتين اللى فضيت فى اليوم ده .. يللا خللى الناس تسترزق

وشويه بقى جت واحده اعرفها قلتلها بقى تحكيلى باستفاضة عن الفالانتاين ده

قلتلها : ايه حكاية الفالانتاين ده؟

بصتلى بصه تمام البصة اللى بصيتهالى الاخت اللى كانت فى الاتوبيس : وقالتلى اولاً اسمه فالانتاينز يا جاهلة اتعلمى بقى

رديت : قال يعنى حرف الزيد ده اللى هيفرق

ردت : زيد ايه يا ام جهل ده حرف اس بس بيتنطق زيد ايه متعلمتيش فى المدرسه

قلتلها : لا اتعلمت بس معلموناش الفالانتاينززززززززز بتاعك ده .. وعموما اهو منكم نستفيد

وقعدت بقى تحكيلى ان معرفش مين كان بيحب مين .. قام مين مرضيش يجوزهم .. راح عم فالنتاين ده جوزهم وعملوله عيد بقى.


يا سلام طيب ماهو المئازين " جمع مأذون يعنى" ماليين البلد ميعملوا لكل واحد بقى عيد ويبقى عم حسنىز داى ، وعم رءووف ز داى ، وعم مش عارفه مين داى وتبقى هيصة بقى وعيد كل يوم.. اشمعنى دول محدش عبرهم وعملهم عيد يعنى " تخيل تلاقى واحد بيقول هابى محسنز داى.. هتبقى تحفه"


والله هم يضحك.. وتلاقى بقى ايه الجامعه مليانه اتنينات اتنينات متبعترين فى كل حته وكل واحد فيهم عمال يسبل بقى للتانى والهدايا رايحه جايه ... من هنا لهناك ومن هناك لهنا ومن هنا لهناك ومن هناك لهنا ومن هنا لهناك .. لاااااااااااااااااااااااا كفاية انا كده هيجيلى حول وهتجنن

انا بس كان ايه اللى خرجنى من بيتنا النهارده


لا وايه اللى عرفته بقى ان فى عيدين فى السنة قال ايه واحد مصرى والتانى عالمى .. الله هو عم فالانتاين ده مش عاتق لا مصرى ولا اجنبى .. ده كده تعدى على تخصص اسامة منير وبيقطع عليه ... ده تلاقى اسامه لو يعرفه هيقطعه.. ولا ليه المسامح كريم واسامه قلبه طيب ... طيب خالص وبيساع كل بنات مصر والعالم العربى اللى بييجوا يقضوا اجازاتهم هنا فى مصر. والله ده هو اللى مقطع على شباب اليومين دول


لأ وايه تلاقى الست اللى بتبيع الورد واقفه على كوبرى الجامعه وتجيلى انا وصاحبتى واحنا ماشيين وتقولنا : كل سنة وانتم طيبين ربنا يخلى ايامكم كلها حب

يا ستى حب مين بس النهارده عيد الحبيبة زى ما بيقولوا مش تقوليلى انا وصاحبتى ...

وسلملى على الفالانتاينز بالزين لحد يتضايق ولا حاجة

وعجبى


سيبكم بقى من كل ده وتعالوا احكيلكم على حاجة: ايه بقى حكاية الفالانتاينز ده: الناس تدافع وتقولك عيد الحب والناس تفرح بعضها وتبقى تمام التمام ويبقى يوم الناس تفتكر فيه بعض ويتبسطوا سوا

طيب ممكن اقول حاجة؟

انتم : اه اتفضلى

انا : مرسى .. شكراً


شوفوا يا جماعه.. انا مش ضد اننا نحب بعض ونفرح بعض.. بس ليه الفالانتاينز... ايون "على راى احمد حلمى" ايون ليه الفالانتاينز؟ وعلى اى اساس ؟ وايه مدى ارتباطه بينا وبثقافتنا كعرب ومسلمين وايه مدى صلته بديننا .. هو اى حد يطلع باى اختراع نتجنن بيه كده ونحتفل بيه وخلاص كده من غير حسابات عقل


وبعدين حب ايه بقى اللى بنحتفل بيه : حب الولد والبنت اللى لسه بياخدوا مصروفهم من ماما وبابا وبيتقابلوا من وراهم وبيحوشوا مصروفهم ده علشان يجيبوا هدايا لبعض؟؟؟؟

ولا حب الولد للبنت اللى بيشتغلها وبيثبتها بكلمتين علشان يتسلى شويتين وبعدين يشوف غيرها؟؟؟

ولا حب الشباب اللى ماشيين فى الشارع ماسكين ايد يعض ولا ماشى واخدها تحت دراعه وقال ايه بيحبها؟؟؟

هو لو بيحبها مش هيسمح لحد يبصلهم بصه مش هى خصوصا ان ده مش من الادب ولا الدين ولا الاحترام ابدا انه يمشى بالمنظر المشين ده

ولا الحب بتاع التليفونات اللى ببقضوها فيها رغى لحد وش الصبح ولما تحس ان فى حد جاى تقوم تتنطط وترمى التيفون بعيد وكانها بتسرق ومش عايزة حد يشوفها- ولا كانها ليه هى فعلا بتسرق؟؟

ولو هنتكلم عن الحب اللى بين الزوج وزوجته او الام واولادها او الاصحاب وبعضهم او الاخوات مع بعض ... فمش لازم يكون فى يوم هو ده بس اللى بنعبر فيه عن حبنا المفروض بنعبر عنه فى كل وقت ... ممكن يكون فى يوم نفتكر فيه ذكرياتنا الحلوة سوا بس مش شرط يبقى موحد لكل الناس كل حد وليه يومه الخاص وده فى خصوصيه اكتر وطعمه احلى 100 مرة واكتر


وحتى لو عايزينه يوم واحد ليه يبقى مرجعه ومرده الى قصه قديس زوج اتنين ... اصلا مين هما الاتنين ومين هو القديس ده علشان يبقى عيد يحتفل بيه العالم كله ... هل خلاص هما دول الاكملين اللى يستحقوا يبقوا قصه تتحكى لكل الناس ونخلد ذكراهم ... طيب على اى اساس؟؟؟؟؟؟


يمكن اتكلمت اكتر شوية عن السلبى ويمكن فى ناس مش بيعملوا حاجة غلط فى احتفالهم بس مش دى الفكرة .... وفى الواقع ان اغلب اللى بيحتفلوا فى العيد ده بيحتفلوا غلط وبيبقوا ناس من النماذج اللى رصدتها فى كلامى ومش ده اللى المفروض يحصل ... ده احنا كده بنديهم فرصة وبندعمهم انهم يعملوا الغلط لأ وايه عملنالهم يوم وخصصناه ليهم يعملوا فيه اللى عايزينه ويهادوا بعض من غير اى قيود ولا ملزمات وبقى الغلط شائع وهو ده الطبيعى وكمان بنحتفل بيه


انا كده خلصت كلامى


وسلملى كمان مرة على الفالانتاينز .........

وعجبى على زمن اختلط فيه الحق بالباطل......................

  • Digg
  • Del.icio.us
  • StumbleUpon
  • Reddit
  • RSS